David Trastoy protagonizará unha nova Masterclass de preparación para o WMC Kerkrade 2026

A Agrupación Musical da Limia continúa coa súa programación formativa dentro do proxecto Destino WMC Kerkrade 2026 coa celebración dunha nova Masterclass de Preparación para Banda, que contará como profesor convidado co director David Trastoy Oseira.

A sesión terá lugar o xoves 9 de xullo de 2026 na Escola de Música da Limia e estará dirixida aos músicos da Agrupación Musical da Limia como parte do proceso de preparación para a súa participación no World Music Contest (WMC) Kerkrade 2026, un dos certames bandísticos máis importantes do mundo.

David Trastoy é un dos directores galegos con maior proxección na actualidade. Formouse musicalmente na Banda de Música de Vilalba e no Conservatorio Profesional da súa localidade, completando posteriormente os seus estudos superiores de Dirección no Conservatorio Superior de Música de Vigo baixo a tutela de Jonathan Vázquez.

No ámbito pedagóxico, é graduado en Educación Primaria con Mención en Música e posúe o Máster en Formación do Profesorado de Educación Secundaria. A súa actividade docente desenvolveuse en numerosas escolas e conservatorios de Galicia, impartindo tamén cursos e masterclasses para diferentes agrupacións, entre elas a Banda Sinfónica Infantil e Xuvenil de Galicia e diversas bandas de España e Portugal.

Actualmente desempeña o cargo de director académico e artístico da Escola de Música Municipal do Porriño e da Banda de Música Popular de Rubiós (As Neves), compaxinando esta actividade cun intenso labor como director convidado e formador.

Esta masterclass permitirá aos integrantes da Agrupación Musical da Limia seguir perfeccionando aspectos fundamentais da interpretación colectiva, o traballo musical e a preparación artística de cara ao reto internacional que supón representar a Galicia no WMC Kerkrade 2026.

Porque os grandes proxectos tamén se constrúen aprendendo dos mellores.

Xuntos, cara ao WMC Kerkrade 2026. O soño continúa.